ಪಡುಬಿದ್ರೆ: ಕಾರ್ ಚಾಲಕನೋರ್ವ ಎಕ್ಸ್ಪ್ರೆಸ್ ಬಸ್ ಚಾಲಕನಿಗೆ ಚೂರಿಯಿಂದ ಇರಿದ ಘಟನೆ ಇಂದು ಪಡುಬಿದ್ರೆ ವ್ಯಾಪ್ತಿಯ ಬಂಟರ ಭವನದ ಸಮೀಪ ನಡೆದಿದೆ. ಉಡುಪಿ- ಮಂಗಳೂರು ರೂಟಿನ ಮಾಸ್ಟರ್ ಹೆಸರಿನ ಎಕ್ಸ್ಪ್ರೆಸ್ ಬಸ್ಸಿನ ಚಾಲಕ ಶೈಲೂ ಎಂಬವರು ಇರಿತಕ್ಕೊಳಗಾಗಿದ್ದು, ಇವರನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಚೂರಿ ಇರಿದ ಕಾರ್ ಚಾಲಕ ಮೂಲ್ಕಿ ಸಮೀಪದ ಕೊಲ್ನಾಡ್ ಮೂಲದವನಾಗಿದ್ದು, ಈತ ಪರಾರಿಯಾಗಿದ್ದಾನೆ.
ಎಕ್ಸ್ಪ್ರೆಸ್ ಬಸ್ ಚಾಲಕ ಶೈಲೂ ಎರ್ಮಾಳು ಎಂಬಲ್ಲಿ ಹಾರ್ನ್ ಹಾಕಿ ಕಾರನ್ನು ಓವರ್‌ಟೇಕ್ ಮಾಡಿದ್ದಾನೆಂಬ ಕಾರಣದಿಂದ ಕುಪಿತನಾದ ಕಾರ್ ಚಾಲಕ ಪಡುಬಿದ್ರೆಯ ಬಂಟರ ಭವನದ ಸಮೀಪ ಬಸ್ ಕಾರಿನಿಂದ ಅಡ್ಡಗಟ್ಟಿ ನಿಲ್ಲಿಸಿದ್ದಾನೆ ಎನ್ನಲಾಗಿದೆ. ಕಾರಿನಿಂದ ಇಳಿದ ಚಾಲಕ ಬಸ್‌ಗೆ ಏಕಾಏಕಿ ನುಗ್ಗಿ ಬಸ್ ಚಾಲಕ ಶೈಲೂವಿಗೆ ಇರಿದು ಅಲ್ಲಿಂದ ಪರಾರಿಯಾಗಿದ್ದಾನೆ. ಶೈಲೂ ಅವರ ಮುಖದ ಭಾಗಕ್ಕೆ ಗಾಯವಾಗಿದ್ದು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪೊಲೀಸರು ಯಾವುದೇ ಅನಾಹುತ ಸಂಭವಿಸದಂತೆ ಬಂದೋಬಸ್ತ್ ವಹಿಸಿದ್ದಾರೆ. ಈ ಬಗ್ಗೆ ಪಡುಬಿದ್ರೆ ಠಾಣೆಯಲ್ಲಿ ಕೇಸ್ ದಾಖಲಾಗಿದೆ ಎಂದು ತಿಳಿದುಬಂದಿದೆ.
